Cattanaj e ... cartolinn - Poeta milanese Bico Contursi

Vai ai contenuti

Menu principale:

Cattanaj e ... cartolinn

Poesie
 
 



Gh'è dent la mia anticamera on guarneri

pien de ròbb vegg, on mucc de cattanaj

La mia regiora la dis, giust con criteri:

-Desfèscet d'on quaicòss... fá nò el bagaj!-



La gh'ha reson, ma hinn ròbb del mè papà

che tegni cont amor e adorazion

hinn tòcch de la mia vita e in verità

aveghi pù me mett agitazion...



Bollitt, moned, di timber tipografich

medaj, calendariett de perrucchee

tolitt, faccett, pennitt, penn stilografich

santitt, cartinn e on vegg salvadanee



Ma a la collezion de cartolinn

ghe tegni pròppi tant: bei ordinaa

ligaa coi naster, dent di scatolinn

hinn ben tegnuu de cunt, catalogaa



De tant in tant je foo passà pian pian …

vegg cartolinn, che adess hinn ingiallii

mostren quell che a sò temp l'era Milan

che a tanti ròbb l’ha daa el benservii.



De spess i cartolinn scoeuden penser

emozion, sensazion de mì pinella

e me pòrten indree per i senter

de la mia vita che in di regòrd, l'è bella.



Cartolinn con scrivuu sù di salutt

auguri, cortesii per contattass

Incoeu ‘na freggia mail ‘me sostitutt

l'ha giazzaa 'l gust romantich d'incantass.

 
 
Torna ai contenuti | Torna al menu