Chì, arent a mì - Poeta milanese Bico Contursi

Vai ai contenuti

Menu principale:

Chì, arent a mì

Poesie
 

Incoeu l'’è succeduu

quell che prima ò dòpo

mì dovevi subì …

el ferr de soppressà

l’ha deciduu d’andà

pròppi a fass benedì

(se ved che l’era stuff).

    -Fa nient?? ...  Ma che rognassa,

    son giò de cantoria

    e gh’hoo la luna sbiessa,

    se gh’era chì el mè pà

    l’avaria sistemaa

    tutt in d’on bòtt .. e a uff!

    Cont i sò man d’artista,

    tranquill e senza pressa,

    medegava tusscòss

    come on professionista.-

Mì hoo mai giustaa nagòtt!

Cert, lù se le ciappava

e ghe fasevi on tòrt

se mì el ciamavi nò

quand de spess on quaicòss

l’andava a dà via i ciapp.

Mì s’eri bon domà

de fà bòna presenza,

domà de stà a vardà

citto cont ubidienza.

Lù l’era el capp e mì

garzon (se fa per dì!)

    Come ‘n presentiment …

    come se ‘na ventada,

    on fluscià d’ona man

    che me desa i cavèi,

    ... 'na vos "Sù! Datt de fà!

    Dai ciappa el casciavid.”

Me metti lì a forcà,

smonti , dervissi el ferr,

svida, invida, netta

mollett e resistenza

poeu  'na bella ingrossada ...

Per falla curta el ferr …

de bon  el s’è inviaa

pront per la soppressada.

   Mì seri soddisfaa,

   me sentivi on eròe

   de … de la resistenza.

                 ……

Mì son sicur che lù

-el mè magich papà-

de spess e  sgalis … pian

pian el taja el cordin

dal Paradis e schisc

el se piazza visin

a mì per damm ‘na man

a sbrojà el roseghin.

   Sì, mì el senti de bon,

   me rendi cunt ch’el gh’è.

   L'è come se 'l voress

   compagnamm in la vita

   con la soa man cortes.

E poeu quand mì ghe cerchi

on consili ver, s'cett,

per paramm di sorpres,

pensé! ... lù me le dis

pian, sòttvos in di oregg

... in dialett milanes!

 
 
Torna ai contenuti | Torna al menu