Ciappa el Tramm ... (Mariangela) - Poeta milanese Bico Contursi

Vai ai contenuti

Menu principale:

Ciappa el Tramm ... (Mariangela)

Poesie
 
 

                                                                                                  
     
Biondina, cavèi longh                                                                     

color del sô a mezzdì,

el nas a patatina,

oeugg celest ... viv.

    T’hoo mai veduu rid de gust,

spansciass a ‘na battuda;

el tò sorrisin strengiuu-

el tegneva sconduu

on ciccin de malinconia.

    Semper insèma

d’estaa in colònia al mar,                                   

te ciamaven “Gandolin”.

Senti anmò el dolor

ai man de quand,

a giugà al serc

“Ciappa el tramm balorda

ciappel tì che mì son sorda

trich e trach lassel andà”

coi zòccor te m’je schisciavet,

e tutt’i fioeu a rid!

    El tò splendor

el me striava … m’ inorbiva.



    El temp birbon el passa

senza dì nient,

el passa e basta.

I strad al carròbbi

se perden in mila direzion.



    L’altr’ier in piazza del Dòmm …

‘na furugada,

la gent la fa a sbuttoni.

Arent on cercòtt,

settaa-giò in terra

mezz sognorent,

‘na dòna la mena el dedree

senza ritegn,

la gira in tond,

la insebiss on ball smòrbi

… la canta sòttvos

“Sola me ne vo per la città,

sola tra la folla che non sa,

dove sei perduto amore …”

    La lumi ben …

cavei biond

color del sô vers sera,

oeugg celest viscor e lughii,

tond, carimaa,

mostra on sorris invernisaa de gris

sòtt’on nas a patatina.

     Sorpres, (l’è vera!...)

On vortis d’emozion

pront a s’cioppà:

“Mariangela!”

ghe ciami commòss.

La me sbarloeuggia, quaccia

la fa ninà l’indes

tra i mè oeugg:

“Ciappa el tramm … balorda

ciappel tì che mì ……”

    e la va giò

di scal del Metrò

a perdes in del nient.

 
 
Torna ai contenuti | Torna al menu