Funeral de paes - Poeta milanese Bico Contursi

Vai ai contenuti

Menu principale:

Funeral de paes

Poesie
 

Tappasci pian pianòtt coi mè penser

su la strada che mèna invèrs la gesa,

vedi sul bòrd on carr, pront in discesa,

caregaa d'ona cassa e di fiorer.



Funeral de paes in procession,

i zòccor ticch tacchen sù la rizzada

con la gent in silenzi e rassegnada

e 'l prevòst cont i man in orazion.



El bròcch, rodaa a di carr de tutt'i sòrt,

de colp, su la discesa, el slonga 'l pass,

e la gent, certament cont imbarazz,

la tacca a corr per minga pèrd el mòrt.



Vedè corr via el bròcch cont el carrett

mì l'avevi mai vist ... a 'n funeral!

Me metti a corr anmì fin al piazzal

vesin a on vecc sudaa cont el boffett;



ghe ciami cunt in prèssa, con vos bassa:

"El mòrt l'era 'n sportiv ... fòrsi 'l correva?"-

"Nò, el laorava in banca ...…'l me diseva

On dì ò l’alter scappi con la cassa!"

 
 
 
Torna ai contenuti | Torna al menu