Gioventù tradida - Poeta milanese Bico Contursi

Vai ai contenuti

Menu principale:

Gioventù tradida

Poesie

Sette anni con la divisa addosso a un ragazzo con capelli nerissimi (mio padre) pieno di vita costretto a una guerra per lui assurda e che gli ha condizionato il futuro. (Grazie a Dio non ha mai perso il suo spirito ironico).Dedicato alle persone che non hanno goduto i migliori anni di gioventù.

 



La mattina bonora

sul corridor

arent a la ringhera,

Severina, la “matta”

in desabiglié

e descaviada,

la pedòna beada

innanz e indree,

la dis sù ‘na lienda

compagn d’ona stria,

malapèna la m’ha vist:

    “Ciao Negher!”



Stessa bugada

tutt’i mattinn   

a tossegamm a mì

che, bici in spalla

(la mia “Spaventa”)

corri giò per i scal

pront a ‘lenamm

da cors Sempion

fin la gesa de Rhò

e poeu … a bottega

a guadagnamm la micchetta

‘me tornidor a la “Galileo”.



Dal veder del gabbiòtt

la portinara:

“Nino, l’è rivada!

Te gh’hee squas vintun ann

e ‘dess te tocca tì

servì  la Patria”

L’era november del trentòtt .



In sul moment …

-Nò …! Disemmela tutta!

Tròpp taccaa ai mè gent,

tròppa voeuja de viv.

Mì … l’uniforma … mah!-

A coo bass, motrient,

col gropp in gola

slisi foeura de cà

col sarà sù pian l’uss

(la mia man  la voreva minga

distaccass dal pomell).

M’è toccaa andà!



 L’era minga assee fà el soldaa …

 soramaròss

 gh’è rivaa la guerra.

 On para d’ann in Albania

 e poeu …sbattuu in mila sit

 in gir cont el “Lancia Rhò”

 de l’autocentro.

 E inscì mì …

 hoo salvaa la Patria!

 Sett ann d’inferna,

 de vita grisa

 -disi … sett ann!-

 sett ann cont indòss la divisa.

 (t’hee portaa a cà el pellòtt?

 Te diset nagòtt! … Che fortuna!)



 Torni a cà in di mè gent

 dòpo sett ann

 col moral sòtt’i pee,

 col coeur ch’el magòna

 sossenn consciaa

    che … me se conoss pù.

 Voo sù  ‘dasi per la scala

    con ‘sto penser …

 Sul corridor

 arent a la ringhera

 la Severina

 senza fà ona piega

 la sbòtta foeura:

       “Ciao Negher!”     

 
 
Torna ai contenuti | Torna al menu