L’impiccaa - Poeta milanese Bico Contursi

Vai ai contenuti

Menu principale:

L’impiccaa

Poesie
 
 

Ziffolavi in stondera vagabond,

sul vicol alberaa adree la cassina,

me par de ravvisà là invèrs el fond

vun ligaa a bandolera, in pompardina,



tacca-sù cont on cappi a on ramm bell gròss,

sfollarmaa, che ‘l vosava a scarpagòss.



L’era ligaa ‘sto cappi sòtta i sell,

sora el stòmeg (e mì capivi nò!)

De corsa rivi lì ‘rent el sonell:

“Mocchela de fà ‘l matt, ven subit giò,



s’te fee taccà-sù lì ‘me ‘na pigòtta!”

“Voeuri morì, son stuff! Gent … ma che bòtta!



Hoo perduu el lavorà, senza speranz

e la m’ha mettuu i còrna anca la miee,

la tosa la se dròga … a fà, voo innanz?

Voeuri morì, voeuri pù fà el badee!”



“Ma damm a trà, se te voeuret morì,

el cappi … el va nò pròppi mettuu lì!



La còrda la va missa al còll … ligada,

compagn del gropp de fà ai cravatt

per compì l’òpera, la va tirada

se nò l’è inutil, ‘sto vosà, ‘sto sbatt.”



“Ma se te credet! Sì mi gh’hoo provaa!

Ma … pòrco can, el me mancava … el fiaa!”

 
 
 
Torna ai contenuti | Torna al menu