Marisin “la netta … la netta” - Poeta milanese Bico Contursi

Vai ai contenuti

Menu principale:

Marisin “la netta … la netta”

Poesie
 

(...La portinara di cà popolar...)


Vestida sbrindolòna con stivai,

vaiana a quadretton on poo tacchenta,

cont on panett sui spall e sperluscenta

e bragh con disegnaa-sù di parpaj,



    la Marisin, pussee che portinara,

    l’è impegnada a tegnì nett el palazz

    e la se perd in centmila svolazz

    col cicciarà besios ‘me 'na zanzara.



-Varda la Marisin, l'è lì a sguaità,

in posizion d’attesa, de sorniòna …

tira a man!  Sì, … l’è a curà la boccalòna

a inzigalla domà per sabettà.



    Cosa la gh'avarà de cuntagh-sù!

    al pòst de dass de fà a sgurà basèi

    la tappella sui scal … pòr scinivèi

    de chi ghe borla denter! ... Car Gesù!



Speremm gh'abbien adree la Cibalgina

per balcà el mal de coo che de sicur

gh'evitarà de piccà i pugn sul mur

e digh infin –Sù, dagh ‘na tajadina!-



    Ma quand de tant in tant se sent rivà

    la Marisin de man al sò fiolin,

    par la scala ciappada d’on festin,

    i inquilitt fann cagnara a festeggià.



El gh'ha trii ann Mariett, l'è pròppi bell,

con di bòccol doraa, faccin redond

con duu oeucc de foin, celest, profond

ch’el regala sorris de ruffianell.

       

  La Stringhetti l'è pronta a fà i moinn,

  la Piera la ghe mòlla on ciccolatt,

  la Frida la ghe fa carezzà el gatt

  la Tibiletti le ciama "Bell rattin!”



In d'on moment i scal hinn pien follaa,

la Marisin la troeuva pù i paròll,

el dritton del Mariett le brascia al còll,

e lee lì citto … senza pù de fiaa.



  El Mariett l'ha dovuu 'ndà da la nòna,

  la Marisin, ligada al lavorà

  e col nettà … per fòrza a cicciarà,

  cert la gent, quand la pò … via la scantòna.

 
 
Torna ai contenuti | Torna al menu