Na sira d'estaa a l'Idroscalo - Poeta milanese Bico Contursi

Vai ai contenuti

Menu principale:

Na sira d'estaa a l'Idroscalo

Poesie
 

A l'Idroscalo, el mar del nòs Milan,

ona banchetta antiga de legn frust

la varda 'l bell tramont che 'l posapian

e a l'ombria de la sira 'l da on grand gust.



D'estaa vers sira 'l sol infogorent

el se speggia sul lagh piatt piatt 'me l'òli

e 'l distend on tappee drizz sbarlusent

che par vegnitt incontra cont orgòli.



El ciel el se colora naranz ciar

e d'on ross viv che pian pian el va in nient

poeu la compar la Luna, titolar

di coeur innamoraa e di sentiment.



Se la podess cuntà quella banchetta …

quanti coppiett intent a progettà

tanti speranz per viv la favoletta

d'ona vita  d'amor grand d' esplorà.



        ……………………………….......................



… Serada dolza, la Luna e 'l ... rest

cont anca ‘n quai fastidi (ma te par !!)

el frecass fòrt de "La punta de l’'Est",

Gò-Cart, la Pista Rossa e i … zanzar !



Sti zanzar visigant, rompamarroni …

te see lì brasciaa-sù a dichiaratt

e te tocca suttà a datt di s’giaffoni

e a padimà 'l purisna col grattatt.



In truscia, disperaa, pien de besèj,

parevi vegh adòss el s’'cioppiroeu,

“lee ..." nanca 'na spongiuda ... amoredèi,

chì zanzar là,  per lee …hinn pòr bestioeu!

 
 
Torna ai contenuti | Torna al menu