San Pio di brasc avèrt - Poeta milanese Bico Contursi

Vai ai contenuti

Menu principale:

San Pio di brasc avèrt

Poesie
 
 

Agosto 1988 con Tògn a San Giovanni Rotondo



“Citto, Tògn! Fraa cazzuu el serviss messa”

Cont el Tògn in stondera e grand ferment   

ciappom pòst in la gesa pesg ch’ in pressa…

Gesa de condizion coi parament;



     su i navad hinn pizzaa di lampedinn,

     gh'è la vos registrada del sermon

     che insubiva el San Pio tutt’i mattinn,

     de scoltà cont amor e devozion.



“Ve foo ved la celletta” Fraa cercòtt

-on sganzerlon, magher e tremacoa

pelaa, senza calzett, coi zoccoròtt

cont on tabarr lisent e in man la scoa-



     S’inviom vers la stanzetta ‘n poo sguarnida

     domà  con ‘na brandina, on ostensòri,

     on vestee frust, ‘na grand fòto zornida

     d’on vecc rosari, on ingenoggiatòri



e sora ‘l ciffonin, fassett desfaa,

on breviari, baston e campanell.

In d’on bòtt on profumm dolz delicaa

 el se spand compagnaa d’on ventisell.



   El Tògn el resta lì come ‘n cocô

   cont indòss on fòrt s’cess e sbalordii…

   le filava nissun… e anmì ‘me lù,

   sentivi la presenza…'m'inlocchii



con la serenità dent el mè coeur.

Inveci ‘l Tògn el stava pù in la pell

e l’era rintronaa come ‘n boxoeur

attent a no mett giò on grand spuell.



    Passom al bar a bev on s’cioppiroeu

   -anca  per mett in pari i sentiment-

    intent a carezzà ‘n bell cagnoeu

    che’l boiava, giraa invèrs el convent



dove gh’era sul mur ‘na sandalina

con la fòto del Sant a brasc avèrt.

El Tògn a vosattà: “Ma che mattina!

El Sant m'ha visitaa…Son pròppi cert!”



     S’infilom anmò in gesa pegs ch’in pressa

    “ Citto, Tògn! Fraa cazzuu el serviss messa”

 
 
Torna ai contenuti | Torna al menu